Edward

Why does your brand sae drap wi bluid, Edward, Edward? Why does your brand sae drap with bluid, And why sae sad gang ye O! O I hae killd my hauk sae gude, Mither, mither: O I hae killd my hauk sae gude; And I had nae mair but he, O!

Your haukis bluid was nevir sae reid, Edward, Edward. Your haukis bluid was nevir sae reid, My deir son I tell thee O! I hae killd my reid roan steid, Mither, mither: O I hae killd my reid roan steid That erst was fair and frie O!

Your steid was auld, and ye hae mair, Edward, Edward: Your steid was auld, and ye hae mair, Sum ither dule ye drie, O! O I hae killd my fadir deir, Mither, mither: O I hae killd my fadir deir, Alas! and wae is me O!

What penance will ye drie for that, Edward, Edward? What penance will ye drie for that, My deir son, now tell me O! I'll set my feet in yonder boat; Mither, mither: I'll set my feet in yonder boat; And I'le fare owr the sea, O!

What will ye do wi touirs and ha, Edward, Edward? What will ye do wi touirs and ha, That were sae fair to see, O! I'le let them stand till they doun fa, Mither, mither: I'le let them stand till they doun fa, For heir I maunae be O!

What will ye leive to bairns and wife, Edward, Edward? What will ye leive to bairns and wife, When ye gang owr the sea O! The warld's room to beg throuch life, Mither, mither; The warld's room to beg throuch life, For them I neir maun fee, O!

What will ye leive to your mither deir, Edward, Edward? What will ye leive to your mither deir, My deir son, now tell me O! The curse of hell frae me sall ye beir, Mither, mither: The curse of hell frae me sall ye beir, Sic counseils ye gied me, O!