XVI. to His Hairt

Returne thé hamewart, hairt, agane; And byde quhair then wast wont to be: Thou art ane fule to suffer pane For luve of hir that luvis not thé. My hairt, lat be sic fantesie; Luve nane bot as they mak thé cause: And lat hir seik ane hairt for thé, For feind a crum of thé scho fawis.

To quhat effect sould thou be thrall But thank? Sen thou has thy fré will, My hairt be nocht sa bestial; But knaw quha dois thé guid or ill. Remane with me, and tary still, And se quha playis best their pawis; And lat fillok ga fling her fill, For feind a crum of thé scho fawis.

Thoch scho be fair I will not fenyie, Scho is the kind of utheris ma: For quhy? Thair is a fellone menyie That semis gud, and ar not sa. My hairt tak nowdir pane nor wa, For Meg, for Merjory, or yit Mawis; Bot be thou glaid, and latt hir ga, For feind a crum of thé scho fawis.

Becaus I find scho tuk in ill, At her depairting thow mak na cair, Bot all begyld go quhair scho will; A schrew the hairt that mane makis mair! My hairt be mirry late and air, This is the fynall end and clause; And let hir fallow ane filly fair, For feind a crum of thé scho fawis.