Frowe aller froͤide ich lobe an dir dc dv dē got gebere

Frowe aller froͤide ich lobe an dir dc dv dē got gebere· des tohter vn̄ des mv̊t̾ dv mit ganzer kv́ſche were· ſo dc dir niht ſwere· wc aller bvꝛden hǒbet laſt· dē doꝛt der himel niht begreif noh hie daſ ert gerúſte· der wolte din gevangē ſin mit vꝛier mv̊t gelúſte· wol der engen bꝛúſte· dar in ſich barc der hohe gaſt· deſ almehtikeit iſt allen ſtarken riſen vbergros· in din h̾ze er ſich beſlos· mēſchlichē hie beſvnder· vn̄ wc zehimel ſamēthaft ſin gotheit ie dar vnder· ſin woꝛt bi dir zefleiſche wart durh ſines geiſtes zvnder· frowe durh dis wunder· nie riches lobes dir gebꝛaſt·