Mir iſt als ich niht lebēde ſi ſwēne ich entnvke ſere

Mir iſt als ich niht lebēde ſi ſwēne ich entnvke ſere· da vō dē tot betútet mir der ſlaf mit ſin̾ lere· bi d̾ ſvnnē kere· bezeichēt mir der ſchatte min· dc im gelich zergat min lebē ǒch wirt ich bi der hitze· d̾ helle ermant ſwēne ich in einer batſtubē geſitze· bi d̾ blůmē glitze· ſpúr ich vnſtet̾ blůmen ſchin· in dem ſpiegel ich erkēne dc ich eſche bin als er· ſo kan mir ǒch d̾ gerner· mit dē gebeine kv́ndē· dc mich die wúrme nagēde w̾dent mit vnreinē mv́ndē· wil ich da bi niht hvͤtē mich voꝛ allē hǒbetſv́nde· in d̾ helle grúndē· mv̊s ich an ende qvelnde ſin·

So we mir tvmb̾ das mich iem̾ lang̾ tage v̾dꝛúſſet· vn̄ min̾ iare vꝛiſt enweg ſo rehte balde ſchú̂ſſet· dc ein bach niht flúzet· ſo dꝛate vs velſe noch vs hage· ich wúnſche dike dc dú ſtvnde w̾de mir gekúrzet· vn̄ iſt ſi doch vf einē gehē lǒf alſo geſchúrzet· dc darinne erſtúrzet· geſwīde ſich min lebetage· ia klage ich min gelt dc ich v̾zer vnde klage niht minú zit· die mir niemā wd̾ git· ſwēne ich ſi gar v̾lúre· v̾tet ich v̾ne gůt ich mag gewīnē and̾s húre· v̾ſwēde ich aber minú iar dú ſint mir iem̾ túre· vō dekeiner ſtúre· v̾tane zit ich wid̾ beiage·