Ie fuis la vile, et temples et tous lieus…

Ie fuis la vile, et temples et tous lieus, Esquels prenant plaisir à t’ouir pleindre, Tu peus, et non sans force, me contreindre De te donner ce qu’estimois le mieus.

Masques, tournois, ieus me sont ennuieus, Et rien sans toy de beau ne me puis peindre : Tant que tachant à ce désir esteindre, Et un nouuel obget faire à mes yeus,

Et des pensers amoureus me distraire, Des bois espais sui le plus solitaire : Mais i’aperçoy, ayant erré maint tour,

Que si ie veus de toy estre deliure, Il me conuient hors de moymesme viure. Ou fais encor que loin sois en seiour.