Las ! que me sert, que si parfaitement…

Las ! que me sert, que si parfaitement Louas iadis et ma tresse doree, Et de mes yeux la beauté comparee À deus Soleils, dont Amour finement

Tira les trets causez de ton tourment ? Ou estes vous, pleurs de peu de duree ? Et Mort par qui deuoit estre honoree Ta ferme amour et iteré serment ?

Donques c’estoit le but de ta malice De m’asseruir sous ombre de seruice ? Pardonne moy Ami, à cette fois,

Estant outree et de despit et d’ire : Mais ie m’assure, quelque part que tu sois, Qu’autant que moy tu soufres de martire.