Carmen XVII

Ludovici Areosti humantur ossa Sub hoc marmore, seu sub hac humo, seu Sub quicquid voluit benignus heres, Sive herede benignior comes, sive Oportunius incidens viator: Nam scire haud potuit futura. Sed nec Tanti erat vacuum sibi cadaver, Ut urnam cuperet parare vivens. Vivens ista tamen sibi paravit, Quæ inscribi voluit suo sepulchro (Olim si quod haberet is sepulchrum), Ne cum spiritus, exili peracto Præscripti spatio, misellus artus, Quos ægre ante reliquerit, reposcet, Hac et hac cinerem hunc et hunc revellens, Dum noscat proprium, vagus pererret.