S Auchterle

Sobald der Wind dur d Stupfla gôht Und d Egda hoppat über d Sôt, Der Star oim uff da Grindel sitzt Und s Gweisch von Spinnawebba glitzt, Nôch, Bruadar, herbstats wäger reacht, Nôch kommt as schleacht.

Wenn d Neabal walet übers Land, Da ganza Tag it weicha want, Wenn s Laub ab Böm und Hecka lôht Und s Wasser in de Lacha bstôht, Nôch hôt der Hiat a baise Zeit – Bei fremde Leut

Hôt koine Strümpf und koine Schuah, Drum fällt a Schlappa vonra Kuah, So springt er wôlli hinta’ drei’ Stellt seine Füaß, de kalte, nei’. Wia gfallet der dia Modischuah? Gealt, jetz hôscht gnua?

Des deucht di wüascht, i glaub ders au. Und doch ischts Büable hoilig frauh, Wenn s seini Füaß so gwärma ka’, Wo s koini Strümpf und Schuah verma’. Du stôhscht in deini Pelzla warm, Der Bua ischt z arm.