Ha que ta Loy fut bonne

Ha que ta Loy fut bonne et digne d’estre apprise, Grand Moise, grand Prophète, et grand Minos de Dieu, Qui grand Législateur commandas à l’Hebrieu Qu’après sept ans passez liberté fust acquise.

Je voudrois, grand Guerrier, que celle que j’ay prise Pour Dame, et qui se sied de mon cœur au milieu, Voulust qu’en mon endroit ton ordonnance eust lieu, Et qu’au bout de sept ans m’eust remis en franchise.

Sept ans sont ja passez qu’en servage je suis : Servir encor sept ans de bon cœur je la puis, Pourveu qu’au bout du temps de son cœur je jouisse.

Mais ceste Grecque Helene ayant peu de souci De la loy des Hebrieux, d’un courage endurci Contre les loix de Dieu n’affranchit mon service.