Poème 95 (Morne de cors, & plus morne…)

Morne de cors, & plus morne d'espris, Je me trainoi' dans une masse morte : Et sans savoir combien la Muse aporte D'honneur aus siens, je l'avois à mépris

Mais aussi tôt que de vous je m'épris, Tout aussi tôt vôtre œil me fut escorte A la vertu, voire de telle sorte, Que d'ignorant je devin bien apris.

Donques, mon Tout, si je fai quelque chose, Si dinnement de vos yeus je compose, Vous me causés vous mesme ces effets.

Je pren de vous mes graces plus parfaites : Car je suis manque, & dedans moi vous faites, Si je fai bien, tout le bien que je fais.