Mir ist ein not vor allem minem leide

Mir ist ein not vor allem minem leide doh gegen disem winter niht was darvmbe valwet grüne heide solher dinge vil geschiht der ich aller mv̊s gedagen ich han me ze tůnne danne blv̊men klagen

Swie vil ich gesage gv̊ter mêre so ist nieman der mir sage wenne ein ende werde miner swere da zv̊ maniger grossen klage dú mir an das herze gât wol bedorfte ich wiser lúte an minem rat

Niender vinde ich trúwe dast ein ende da ich si doch gedienet han guten lúten leit ich mine hende wolten si dar vffe gan des wer ich vil willig in owe dc mir nieman ist als ich im bin

Wol den ǒgen die so spehen kvnden vn dem herzen das mir riet an ein wib dú hat sich vnderwunden gv̊ter dinge vnd anders niet swas ich dvrh si liden sol dast ein kvmber den ich harte gerne dol