Le Désir

Celuy n’est pas heureus qui n’a ce qu’il desire, Mais bien-heureux celuy qui ne desire pas Ce qu’il n’a point : l’vn sert de gracieus appas Pour le contentement, & l’autre est vn martyre.

Desirer est tourment qui bruslant nous altere Et met en passion : donc ne desirer rien Hors de nostre pouuoir, viure content du sien, Ores qu’il fust petit, c’est fortune prospere.

Le desir d’en auoir pousse la nef en proye Du corsaire, des flots, des roches & des vents : Le desir importun aux petits d’estre grands, Hors du commun sentier bien souuent les déuoye.

L’vn poussé de l’honneur par flateuse industrie Desire ambitieux sa fortune auancer : L’autre se voyant pauure à fin d’en amasser Trahist son Dieu, son Roy, son sang & sa patrie.

L’vn pippé du Desir, seulement pour l’envie Qu’il a de se gorger de quelque faux plaisir, En fin ne gaigne rien qu’vn fascheux desplaisir, Perdant son heur, son temps, & bien souuent la vie.

L’vn pour se faire grand & redorer l’image A sa triste fortune, espoind de ceste ardeur, Soupire apres vn vent qui le plonge en erreur. Car le Desir n’est rien qu’vn perilleux orage.

L’autre esclave d’Amour desirant l’auantage Qu’on espere en tirer, n’embrassant que le vent, Loyer de ses travaux, est payé bien souuent D’vn refus, d’vn dédain, & d’vn mauuais visage.

L’vn plein d’ambition desireux de parestre, Favorit de son Roy, recherchant son bon-heur, Auançant sa fortune, auance son malheur, Pour auoir trop sondé le secret de son maistre.

Desirer est vn mal, qui vain nous ensorcelle : C’est heur que de iouïr, & non pas d’esperer : Embrasser l’incertain, & tousiours desirer Est vne passion qui nous met en ceruelle.

Bref le desir n’est rien qu’ombre & que pur mensonge Qui trauaille nos sens d’vn charme ambitieux, Nous déguisant le faux pour le vray, qui nos yeux Va trompant tout ainsi que l’image d’vn songe.