Nvn ist niht mere min gedinge

Nvn ist niht mere min gedinge wan das si ist gewaltig min bi gewalte sol genade sin vf den trost ich ie noch singe genade dú sol uberkomen grossen gewalt dvrch miltekeit genade zimt wol bi richeit ir tvgende sint so vollekomen das dvrch reht mir ir gewaldes sol fromen

Swer so steten dienest kvnde des ich mih doch trösten sol dem gelvnge lihte wol ze ivngest er mit vberwnde das sende leit das nahen gat das wirt lachen vn̄ spil sin truren gat zefreuden vil in einer stvnde so wirt es rât das man zehen iar gedienet hat

Swer so langes bîten schildet der hat sichs niht wol bedaht nah rúwe so hat es wnne braht truren sich mit freudē gildet dem der [so] wol biten kan das er mit zúhten mac vertragen sin leit vn̄ nah genaden klagen der wirt vil lihte ein selig man das ist der trost den ich noch han