Wa hêb vf vnd nicht en vind

Wa hêb vf vnd nicht en vind tůt mir vil dicke leide her bigenot von darbion der ist mir vil gevere des weinent dicke minv́ kint bös ist ir snabel weide er hat si selten sat getan bis vf die fröidenbere in minem hus her dv́nne habe schaffet mir vngerete er ist zer welt ein mülich knabe ir milten helfent mir des bösewihtes abe er swechet mich an spise vnd ǒch an wête

Ich var vf der toren vart mit miner kv́nste zwar das mir die herren nicht wênt geben das ich ir hof wil vliehen vnd wil mir einen langen bart lan wachsen griser haren ich wil in alter iuden leben mich hinnan fúrwert ziehen min mantel der sol wesen lang ties vnder einem hůte demüteklich sol sin min gang vnd selten me gesingen· hovelichen sang sid mich die herren· scheident von ir gůte