Jarlang blözet sich der walt

Jarlang blözet sich der walt vnd ǒch dú heide valwet von dem kalden sne wie hant sich div zit gestalt owe der leide schowent wie der anger ste zergangen ist der grüne kle wil dú reine die ich da meine min vergessen so wirt mir vil dike we

Min frúnde helfent mir der lieben danken der ich singen vf hohen pris gůten trost han ich von ir mehte ich der blanken machen brvn ir roten gris si gert des apfels den paris gab dur minne der gúttinne füge ich dc so mag ich heissen ir amis

Swas ich wil dc ist ir nein mv̊s ich dc liden ê· wie lange sol dc wern alsvs hellen wir enein könde ich gemiden si dc wolde ich fügen gern si wil von mir den liehten stern tremvntanen vnd den manen zv̊ der svnne· des en wil si niht enbern