L’Amant en langueur

EN ces tristes deserts, où s’areste la Cour, I’entretiens vostre Image au doux bruit des fontaines ; Et me plains de l’absence aux sablons d’alentour Qui n’ont pas tant de grains que mon cœur a de peines.

Puis vous ayant offert à chaque heure du iour Des souspirs, des pensers, & des paroles vaines, Ie coniure vn pinceau qui des tourmens d’Amour Vous fera voir en moy des marques bien certaines.

Vous direz, Amaranthe, en voyant mon portrait, Que c’est celuy d’vn autre, & qu’il n’a pas vn trait De ceux que sur mon teint vous auez veu parestre :

Mais ie suis si changé par nos communs ennuis, Qu’à bien parler außi ce n’est pas me cognestre, Que de me recognestre en l’estat où ie suis.