Les Songes funestes

CETTE nuict en dormant d’vn somme inquieté, I’ay tousiours combattu de tristes réfveries, La clarté d’vn tison dans vne obscurité M’a fait à l’impourueu paroistre des Furies.

Prés de moy la Discorde, & l’Infidelité Monstroient leur violence en mille barbaries, Et de sang espandu, par tout leur cruauté Soüilloit l’argent de l’onde, & l’esmail des prairies.

Troublé de ces horreurs ie ne sçay que penser Si ce n’est que le Ciel me veuille menacer De quelque changement en l’ame de Siluie.

Songe, Phantosme affreux, noir ennemy du iour, Parle moy si tu veux de la fin de ma vie : Mais ne m’anonce point la fin de son amour.