Les tristes considérations

PVISQVE par mes deuoirs, inhumaine Siluie, Vostre rigueur s’irrite auec tant de transport, Apres tant de deuoirs, ie voy bien que ma mort Sera le triste prix de vous auoir seruie.

Ie veux bien contenter vostre cruelle enuie, Et finir d’vn beau coup vn si funeste Sort, Esteignant deuant vous par vn dernier effort, Le feu de mon amour, & celuy de ma vie.

Mais, helas ! ie crains bien qu’vn souuenir si beau Me persecute encore au delà du tombeau, Poursuiuant mon esprit sur les riuages sombres ;

Et qu’vn esloignement m’afflige desormais, Car de vous penser voir en l’Empire des Ombres, Les Astres comme vous n’y descendent iamais.