Les vains efforts

MON Ame, deffend toy du desir aueuglé Qui d’vn mouuement déreiglé Souz des fers esclatans te veut rendre asseruie ; Et d’vn sage conseil reiette le poison Qui pourroit nous oster la vie Nous ayant osté la raison.

Considere qu’Amour auecque des apas Nous veut déguiser mon trespas En t’offrant en victime aux plus beaux yeux du Monde : Et qu’entrer au Dedale où tu vas t’égarant Est vouloir s’embarquer sur l’Onde Quand le naufrage est apparant.

Celle qui tient ma vie & ma mort en ses mains Rebute les vœux des Humains Comme indignes deuoirs dont sa Grandeur s’irrite ; Et l’on ne peut sans crime aimer en si haut lieu Si ce n’est qu’auec le merite On ait la naissance d’vn Dieu.

Bornons donc nos desirs, & croyons sagement Tout ce que nostre iugement Peut apporter d’vtile au soin qui nous possede : Estouffons au berceau ces pensers amoureux, Et par vn si cruel remede Euitons vn mal dangereux.

Mais, ô lasche Conseil, de qui la trahison Me veut tirer d’vne prison Que mon ambition prefere à cent Couronnes ; En vain par la terreur tu m’en croy dégager ; Va t’en glacer d’autres personnes Qui s’estonnent pour le danger.

De moy, nulle raison ne sçauroit m’empescher De seruir vn obiect si cher : Le peril qui s’y trouue augmente mon courage. Et si dans ce dessein ie trouue mon Cercueil Ma vie au moins en ce naufrage Fera bris contre vn bel escueil.

Encore que mes soins m’attirent son mespris Ma foy ne sera point sans prix. Et i’auray de la gloire auec de la disgrace ; Car on dira tousiours en parlant de mon sort, Daphnis eut vne belle audace, Et mourut d’vne belle mort.