Sur la colère de Philis

BELLE Philis obligez moy De me faire sçauoir pourquoy Mes soins vous mettent en colere, Car ie ne puis me figurer Ce que i’ay fait pour vous desplaire, N’ayant fait que vous adorer.

Sans doute c’est ma paßion Qui cause ceste auersion Que m’exprime vostre silence : Voyez quel estrange succez, On me hait auec violence Pource que i’aime auec excez.

Ô Dieux ! quelle iniuste rigueur Pour vous auoir donné mon cœur, I’ay donc merité vostre haine : Et i’ay failly pour vous offrir Ce que la beauté d’vne Reine Auroit eu peine à s’acquerir.

Apres vn fauorable accueil Mes deuoirs trouuent trop d'orgueil En des graces toutes diuines. Ô belle cause de mes pleurs ! Que de serpens, & que d'espines Estoient cachez dessous ces fleurs.

Dés lors que les Astres ialoux Firent naistre vostre courroux, La mort fut toute mon enuie ; Car i’ay conceu depuis ce iour Le mesme desdain pour ma vie Que vous auez pour mon amour.