Der tag vns nahet

Der tag vns nahet wer niht versmahet disen warnsang den ich hie singe ein wahter lute sang· swer bi trute lige an armen blang der hebe sich ringe vns nahet balde ein liehter tag ich fúrhte melde dú nie gelag ze solhem dinge

Owe vns beiden wir mvssen scheiden sprach dc reine wib mit trehenden ǒgen ein vmbevahen vnd smuken nahen lieb an liebes lieb ergienc da tǒgen der ritter sprach ze der frowen sin gebút mir lieb wan ich bin din dast ane lovgen

Dv scheidest hinnen in minen sinnen wart mir nie so we sprach dv́ vil reine des mv̊s ich sorgen vúr disen morgen nach dir iemer me min fröide ist kleine dú frowe sprach gedenke an mich sit ich in rehtem herzen dich mit trúwen meine