Heide vnd anger

Heide vnd anger went niht langer blv̊men tragen nv stet blos der grüne walt kalte winde went geswinde hin veriagen leider lǒbes vngezalt rife vnd ǒch der kalde sne selwent beide grüne heide sumer kleide túnt si leide vnd den kleinen vogelin we Sv̊sse grüsse sint so gůt swa liep tǒgen vnder ougen bliken tůt

Ach ich tumber grosser kvmber tůt mir leit da von bin ich vngemv̊t ach wie we dc selbe tůt wc klage ich der blv̊men schin sit ich worgen mv̊s in sorgen manigen morgen vnverborgen von der lieben frowen min Süsse grüsse sint so gůt swa liep tǒgen vnder ougen bliken tůt

Sit die mine starken pine merent sich vnd min fröide swinden wil vnd dú reine harte kleine tröstet mich dc ist mir ein hertes spil we wie sol ich fro bestan sit dú here mir niht lere git vúr sere swar ich kere da von mv̊s ich kvmber han Süsse grüsse sint so gůt swa liep tǒgen vnder ougen bliken tůt

Wie mich wundert sehe ich hvndert tusent wib mir geviele enkeine bc danne dú gůte wol gemv̊te schönen lip hat dú liebe wissent dc ich gesach nie reiner fruht si kan machen frölich lachen trvren swachen bi den sachen hat min frowe wiblich zuht Süsse grüsse sint so gůt swa liep tǒgen vnder ougen bliken tůt Ungewinne mir dú minne dike git da von habe ich vngewin swc ich singe vngelinge nimet mir min fröide hin minne gib mir süssen trost la die reinen valsches einen lieplich meinen mir bescheinen so wird ich der not erlost Sv̊sse grüsse sint so gůt swa liep tǒgen vnder ougen bliken tůt