German poem
Owe houeliches singen
Owe houeliches singen dc dich vngefůge döne solten ie zehoue verdringen dc dich schiere got gehöne owe dc din wirde also geliget des sint alle dine frúnde vnfro dc mv̊s eht also sin nv si also fro vnfůge ir habt gesiget
Der vns fröide wider brehte dú rehte vnd gefüge were hei wie wol man des gedehten swa man von ime seite mere es were ein vil houelicher mv̊t des ich iemer gerne wúnschen sol frowen vnd herren zeme es wol owe dc es nieman tv̊t
Die dc rehte singen störent der ist vngeliche mere danne die es gerne hörent doch volge ich der alten lere ich en wil niht werben zv̊ der mv́l da der stein so rúschent vmbe gat vnd dc rat so mange vnwise hat merkent wer da harpfen sv́l
Die so freuenlichen schallent der mv̊s ich vor zorne lache dc si in selben wol gevallent mit also vngefügen sachen die tv̊nt sam die frösche in eime se den ir schrien so wol behaget dc dv́ nahtegal da von verzaget so si gerne svngen me
Der vngefüge swigen hiesse wc man danne fůge funde vnd si von den búrgen stiesse dc vnfůge da verswunde wurden ir die edelen habe benomen dc were alles nach dem willen min die gebvren liesse ich si wol sin dannen ist si her bekomen