Was hat dv́ welt zegebennet

Was hat dv́ welt zegebenne liebers denne ein wib dc ein sende herze bas gefrǒwen mv́ge was stúret bas zelebenne danne ir werder lib in weis niht dc zefröiden hoher túge swenne ein wib won herzen meinet den der ir wol lebt zelobe da ist ganzer trost mit fröiden vnder leinet disen dingen hat dú welt niht dinges obe

Min frowe ist zwir beslossen der ich liebe trage dort vercluset hie verherret· da ich bin des einen hat verdrossen mich nv manige tage so git mir dc ander senelichen sin solt ich pflegen der zweier slússel hv̊te dort ir libes hie ir tvgent dise wirtschaft neme mich vs senden mv̊te vnd neme iemer von ir schöne nv́we ivgent

Wenet hv̊te scheiden von der lieben mich die ich mit steten trúwen her gemeinet han solhe liebe leiden des verzihe sich ich diene iemer vf den minneklichen wan mag dú hůte mich ir libes pfenden da habe ich ein trösten bi sin kan niemer von ir liebe mich gewenden twinget si dc eine so ist dc ander fri