Was ich doch gegen der schonen zit

Was ich doch gegen der schonen zit gedinges vnd wanes han verlorn swc kvmbers an dem winter lit den wande ich ie des svmers han verborn svs saste ich alles besservnge fúr swie vil ich trostes ie verlúr so hat ich doch zefröiden wan dar vnder misselang mir ie in vant so stete fröide nie si wolte mich ê ich si lan

Mv̊s ich nv sin nach wane fro son heisse ich niht zerehte ein selig man dem es sin selde füget so dc im sin herze lieb wol gv̊tes gan hat ǒch der selbe fröide richen sin des ich vil leider ane bin son spotte er niht dar vmbe min ob im sin lieb iht liebes tv̊t ich were ǒch gerne hohgemv̊t möht es mit liebes hvlden sin

Er selig man si selig wib der herze ein ander sint mit trúwen bi ich wil dc dc ir beider lib getúret vnd in hoher wirde si vil selig sin ir iar vnd al ir zit er ist ǒch selig svnder strit der nimt ir tvgende rehte war so dc es in sin herze get ein selig wib dv́ sich verstet dú sende ǒch gv̊ten willen dar

Sich wenet maniger wol begên so dc er gv̊ten wiben niht enlebe der tôre kan sich niht versten wc es fröide vnd ganzer wirde gebe dem liht gemv̊ten dem ist iemer wol mit lihten dingen als es sol swer wirde vnd fröide erwerben wil der gediene gv̊tes wibes grůs swen si mit willen grüssen mv̊s der hat mit fröiden wirde vil

Ja herre wes gedenket der dem vngedinet ie vil wol gelang es si ein si es si ein er swer also minnen kan der habe vndank vnd da bi gv̊ten dienst vber siht ein selig wib dv́ tv̊t des niht dú merket gv̊tes mannes sitte da scheidet si die gv̊ten von so ist ein tvmbe so gewon dc ir ein tvmber volget mitte