Ac now is Religioun a ridere

Ac now is Religioun a ridere And a rennere aboute, A ledere of ladies, And a lond biggere; Poperith on a palfrey To toune and to toune; A bidowe or a biselard He berith be his side; Godis flessh and his fet And hise fyve woundis Arn more in his mynde Than the memorie of his foundours. This is the lif of this lordis That lyven shulde with Do-bet, And wel awey wers, And I shulde al telle. I wende that kinghed and knighthed, And caiseris with erlis, Wern Do-wel and Do-bet And Do-best-of-hem-alle. For I have seighe it myself, And siththen red it aftir, How Crist counseilleth the comune, And kenneth hem this tale, Super cathedram Moisi sederunt principes For-thi I wende that tho wyes Wern Do-best-of-alle. I nile not scorne, etc.