Aux Compaignons de l'imprimerie

Le boys tortu croissant parmy la vigne Duquel Bacchus a esté plantateur, Et dont on boyt aussi droict qu'une ligne, Faict parler l'homme ainsi qu'un Orateur. O mes amys, je suis vostre debteur, Pour le travail que prenez à ceste heure, Buvez à moy, soulageans le labeur, Si qu'une goutte en voz Pots ne demeure.

A monseigneur, Claude de Granval, maistre d'hostel de ma dame la Duchesse d'Aumale.

Que n'ay je du Grec Pindare L'eloquence Riche et rare Pour mieux chanter vostre nom, Cher Seigneur, duquel la grace Tant de merites ambrace Par un immortel renom?

Que n'ay je la plume exquise De Ciceron tant requise Au facond stile latin, Pour, au desir qui me presse, Chanter de vostre maistresse La grandeur, soir et matin?

Ou que ne suis je à Mauni Avec vous d'un cueur uni Dessoubs la fresche Ramee, Pour escrire la beauté, La douceur, la privauté De ceste Duchesse aymee?

Je dy de ceste Duchesse Loise, dont la Richesse Fondee en toute vertu Monstre l'honeur admirable De la grace incomparable Dont son Esprit est vestu.

Si ay je bien ceste envie Que quelque jour de ma vie A Mauni vous me voyez, Et que la sur la verdure Alors que le Printemps dure Mes joyeux Sonnetz oyez.

Ce sont Sonnetz Poetiques, Et sentences heroiques, Pour tout courroux appaiser, Ou gist l'honeur de ma Dame, Dont le nom tourné, sans blasme Contient: Loy de se baiser.

Ce ne sera sans escrire Quelque chose, pour bien rire, Avec tous voz alliez, De Boyssay tant estimable, Et des Houlles honorable N'y seront point oubliez.

Tandis celluy qui domine Terre et Ciel, et illumine Les Espris des ignorans Permette à vostre noblesse Que vous passiez en liesse Du Facond Nestor les ans.