Stances B. D. F

Depuis ce triste jour que mon ame captive S'empestra des liens de vos cruelles loix, Et que pour vous servir, elle tenoit craintive Le veuë sur vos yeux, l'oreille à vostre voix,

J'arrestay mes desirs du vent de l'inconstance D'espoir & desespoir tous les jours combatus, Et pour les mettre, enfin, dessous quelque asseurance Je leur choisi le port de vos belles vertus.

Il sembloit que l'amour me prestoit la main forte Tant il avoit son front serain de tous costez, Vous mesme, en vos discours, monstriez en quelque sorte Je ne sçay quoy de plus que les divinitez.

Mais ce calme d'Amour ne couvoit un orage Qui me devoit bien tost dissiper le repos : Et vous sous les douceurs de vostre beau langage, Desguisiez un esprit contraire à vos propos.

Quand vous me vistes pris, au lieu de ma franchise Meritoit la faveur d'un aimable recueil, Je n'euz, pour le loyer de si belle entreprise, Que les esclairs tranchans du courroux de vostre œil.

Desdains dessus desdains, martyre sur martyre Couronnoyent les travaux de ma fidelité, Quoy qu'autant que l'estoir digne de vostre Empire Je fusse indigne autant de vostre cruauté.

Quand j'eus beaucoup souffert, ma longue patience Blessee, se changea par contrainte en fureur, La fureur m'alluma le desir de vengeance Pouvois-je sans mourir, voir mourir mon honneur ?

L'enfer mesme voyant les langueurs de ma vie Quoy qu'il soit insensible en print quelque pitié, Et des sanglants cordeaux de la jalouse envie Entortilla les nœuds de vostre autre amitié.

Confessez franchement, vous qui sentez ces peines Et le cruel malheur de vos afflictions, Qu'en matiere d'Amour les offences certaines Sont certaines aussi de leurs punitions.

Toutesfois, vostre mal seul tous mes maux excede, Et je vous plains encor ne fust-ce que ce point, Qu'à tout le moins pour moy vous sçavez le remede Mais pour vous mesme, helas ! vous ne le sçavez point.

Peut estre que changeant encore de courage Vos malheurs envers vous se pourroyent bien changer, Et que ne trouvant point de sujet davantage La jalousie aurait honte de me venger.

Je le crois pour le moins, & faites-vous l'espreuve D'autant plus librement qu'il est plus deffendu, L'attente ennuye bien, mais à la fin on treuve Qu'un bien fait à propos ne peut estre perdu.