In dem grünen kle

IN dem grünen kle sach ich min frowen gan ach was ich da wunnen sach an ir vil vnd me vnd an dem schonen plan das es in min herze brach blůmen clar· vnd dv́ frowe min luchten gegen ein andern dc dú wunne vf gie in gesach nie so lichten schin

Ich bin nach ir so gar senelich verdacht sin helfe mir es ist min tot we wes wart ich fro dc ich dar zů wart bracht do mir dú minne dar gebot don wisse echt ich des rechten smerzen niet in wande nicht in vunde schier genade an ir wan minne mir so süsse dar riet

Hilf mir frowe gůt dur dine selikeit das ich nicht verderbe so sich din frömden tůt mir dise sweren leit owe mache mich noch fro frowe gůt· aller dinge gar wan das du mir stetekliche bist gehas vnd lâst du das so ist es war