Ir sult v́wer swenzel

IR sult v́wer swenzel krispen dirne gůt est erne zit krenzel machen ǒch vf die virtage swiem arebeit in erne hat doch hat man můt da frölichen gerne pfligt man da so loser sage wan dar kumt so manig stolzú dirn· vnd knappe des man da wirt fro ir singet dan so vil süssekliche ho ǒch ist erne recht fröide vf dem stro

Heinlichi mag enden vil der die han mag zînr frowen wol wenden tůt sin des licht senden pin der aber frowen minnen gert der hůte pflig tag vnde nacht gewinnen wirt im da lichte niemer schin des bin ich bar fröiden vnd vol sorgen wies geuar wan ǒch ich dar minne da mich hůte frömdet gar frǒmdes frúnds nam ie so kleine war

Minne din süs twingen hat betwungen mich in suren strit· ringen tůst du mich mit sender not dú gist mir zeherzen sůs ein wib der ich můs frömde sin smerzen můs mich das vnz vf den tot ir wunne gat so sůsse mir zeherzen es verstat die gitat so wol das si so mange wunne hat des minne mich von ir nit scheiden lat