Manig hoher můt

Manig hoher můt der tůt sich aber vnder das vügt des winters zit wan sin getwang tůt krank· von schöne wunder vnd ǒch der voglin strit dú so sůs schöne lobt mit gidöne wer klegte nicht dc man ensicht noch höret· das vns e machete fro

Doch můs der pin mir sin· vor allem smerzen der mir senlich tůt we wan si noch nie verlie· min klage ze herzen was solte ich klagen me vnd doch ir min trúwe waren ie so núwe da von tůt mir so we von ir frömden owe ... lies si das noch

Dv́ minne kan nit han· die rechten mâsse dc ist mir leider kunt wan si mich treit in leit· die strengen strâsse vf senelichen grunt ein wib schöne vnd here liebt si mir so sere vnd nicht ir mich da uon si sich mir frömdet· ach mich twinget ǒch ir lib