Nach liebe gat leit

Nach liebe gat leit ich můs ein wib erschreken sang ein wachter dú noch bi frúnde lit ir si giseit dis si in balde sol weken wan es wil tagen dauon ist es zit in not ich stan vbrig liebi vúrchte ich dc si sich dur liebi wâgen vnde mich wir můssen lan vnser leben vnd ere sún han vor tage dan gescheiden sich

Si tet ims kunt frúntlich mit vmbeuange vnd ǒch mit manigem brústel druke do ir roter munt sprach frúnt du slafst zelange wir suln vns scheiden swies vns macht vnfro der herre gůt ir wekens da bepfant er sprach mir ist wol vnd ist mir leit erkant mir fröit den můt din minnenkliches trúten so tůt mir we dc ich von dir můs zehant

Gv̊t herre min es mag sich mer gefügen ob wir vns scheiden e mans werde gewar frowe das sol sin wir sun vns lan genügen das wir die nacht waren frölich sament gar frowe vnz har nach so gib nv vrlob mir si sprach herze das gib ich noch kume dir wie ist dir sus gach da ist frowe vmb din ere· si sprach nu uar wie kume ich din embir