Nieman vol

Nieman vol loben frowen kan wan si bi· tugenden wonent alse schone selden krone sint ir ingesinde wol· in wol iemer des wúnsch ich mich· sol wol· des můt zihen in gemüte dik ir güte ich so wol beuinde

Ein schones wib ein wiblich lib dú süsse güte mang gemüte so sůs durgat· so dc er fro můs sin der wunnen die dem lichten sunnen gelichent sich wib sint so manger wunnen rich ia were es wol das liebes vol wer sin gemüte der ir güte mit lobe dike tůt lieblich gůt ia wol dien frowen wan mag an in schowen so süssen schin wan mag bi in wol frölich sin

So stent schone ir tinne ir hǒbt kelen nak· ir kinne ir brústel ir ǒgen· des man sol wol· dar war· gerne nehmen Der welte krone sint frowen gar süsse ist ir anschowen ir ist vil so rein manig frowe gůt tůt· das swas· wol mag zemen

Vnd wer es nicht ein zůuersicht doch sendes smerzen mannes herzen swanne er sicht so gar wunne var die schonen frowen doch git im das schowen hohen můt swie we doch sendes iamer tůt Sit mannes můt wirt so gar gůt swanne er mag schowen schone frowen so wurde er erst fro keme es so dc er ezliche wiblich wunnenriche solte vmbeuan so möchte er erst rechte fröide han

Si hant los· gebaren die reinen frowen claren gar lieblich stet ir kosen· da von wol wir ir· noch mugin vns fröiwen von schulden sere wen· verdros ie frowen der si rechte konde geschowen der wart nie sicherliche des dunket mich ich· kan· an· in wol wissen so gar hoch ere

Wie möchte ein man iemer verlan im kême zesinne rechte minne bi frowen so fin lichter schin durgat sin ǒgen da so lieblich tǒgen so kvnt er in fröde· vnd doch in sende ger

Es ist klein· nicht das gůt man sicht an schonen wiben es kan triben leit wol von dem man der wol kan inzstan ir güte so wirt sin gimüte fröiden rich wib sint zerechte minnenklich

Ir minnenklich· lachen· wunne san kan· doch noch· mangen wilden můt· vnd sinne da bi minne sinem herzen bringen Ir wiblich hende zartlich· wis pris· ich gich wiblichen bilden manig gimüte nach ir güte můs von schulden ringen

Swenne ein schön wib ir schonen lib so schone treit vnd wol bekleit so kumt si danne so gar lieblich clar so wol ze prise als vs dem paradýse kom ir lib ach wie sint so gůt schönú wib der wibe lön· sint süsse· vnd linde swer der beuindet der erwindet an ir dienste nicht swiem geschicht er müsse danne sterben wan mag gerne werben vmb dú wib si hant so minnenklichen lib

Ir wiblich tanzen mannes můt tůt· so fro doch gar seneliche· der recht achtet vnde trachtet wie loslich sis kunnen minnenklich stent in wiblich kleit breit· so wol man ir wunne machin· mannes ǒgen werdent tǒgen lieblich vol ir wunnen

Ja mag der han so lieben wan der dik mag schowen schone frowen wan er wirt dik so lieblich fro wan frowen wunne lúchtet sam der sunne mannes lib fröit nit so wol so schonú wib secht doch swer· vil gedenken wil nach frowen bilde der wirt wilde wan er sicht· wol noch wunne doch an schonen wiben das wirs iemer triben frowen fin müssen vor allen wunnen sin