De Cómo El Arçipreste Ffue Enamorado

Assy fue que un tienpo una dueña me prisso, del su amor non fuy ese tienpo rrepiso: ssienpre avía della buena fabla e buen rriso, nunca al por mi fizo nin creo que fer quiso. Era dueña en todo e de dueñas señora, non podía ser solo con ella una ora; muncho de ome se guardan ally do ella mora, más mucho que non guardan los judíos la Tora. Ssabe toda nobleza de oro e de seda, muy conplida de byenes anda manssa e leda. Es de buenas costunbres, sossegada e queda: non se podrá vençer por pintada moneda. Enbiél' esta cántiga, que es deyuso puesta, con la mi mensajera, que tenía enpuesta; dize verdat la fabla: que la dueña conpuesta, si non quiere el mandado, non da buena rrepuesta. Dixo la dueña cuerda a la mi mensajera: "Yo veyo muchas otras creer a ti, parlera, e fállanse mal ende; castigo en su manera, bien como la rrapossa en agena mollera".