Enxienplo De Las Liebres

«Andávanse las liebres en la silva llegadas; sonó poco la silva e fuxieron espantadas: fue sueno de laguna e ondas rrebatadas. Las liebres temerosas en uno son juntadas. »Catan a todas partes, non pueden quedas seer: disen con el grand' miedo que se fuesen esconder; ellas esto fablando ovieron de veer las rranas con el miedo so el agua meter. »Dixo la una liebre: "Conviene qu' esperemos; non somos nos señeras, que miedo vano tenemos; las rranas se asconden de balde, ya lo vemos: las liebres e las rranas vano temor tenemos. »A la buena esperança nos conviene atener. Fásenos tener miedo lo que non es de temer: Somos de coraçón flaco, ligeras en correr. Non deve temor vano en sy ome traer".— »Acabada su fabla començaron de foyr. Esto les puso miedo e fiso a todos yr: En tal manera tema el que bien quiere bevir, que non pierda el esfuerço por miedo de morir. »El miedo es muy malo syn esfuerço e ardid: esperança e esfuerço vençe en toda lid: los cobarden fuyendo mueren disiendo: «foyd!» biven los esforçados desiendo: «daldes, ferid!» »Aquesto acaesçe a vos, señora mía, e a todas las monjas, que tenedes fraylía: por una synventura muger, que ande rradía, tenedes vos que todas yrés por esa vía. »Tened buena esperança, dexad vano temor: amad el buen amigo, quered su buen amor; si más ya non, fablatle com' a un chato pastor: desilde: "¡Dios vos salve! e dexad el pavor"».— «Tal eres», diz' la dueña, «vieja, como el diablo, que dio a su amigo mal consejo e mal cabo: púsole en la forca, dexólo y en su cabo. Oy' la fabla e non quieras mi daño e menoscabo».