Enxienplo De Lo Que Contesçió Á Don Pitas Payas, Pintor De Bretañia

Del qu' olvyda la muger te diré la fazaña: sy vieres que es burla, dyme otra tan maña. Era don Pitas Pajas un pyntor de Bretaña; casó con muger moça, pagávas' de conpaña. Antes del mes cunplido dixo él: "Nostra dona, yo volo yr a Frandes, portaré muyta dona".— Ella diz': "Monsener, andés en ora bona; non olvidés casa vostra nin la mia presona".— Dixol' don Pitas Payas: "Doña de fermosura, yo volo fer en vos una bona fygura, porque seades guardada de toda altra locura".— Ella diz': "Monssener, fazet vuestra mesura".— Pyntol' so el onbligo un pequeno cordero. Fuese don Pytas Pajas a ser novo mercadero. Tardó allá dos anos, muncho fue tardinero, façías' le a la dona un mes año entero. Como era la moça nuevamente casada, avíe con su marido fecha poca morada; tomó un entendedor e pobló la posada, desfízos' el cordero, que dél non fynca nada. Quando ella oyó que venía el pyntor, muy de priessa enbió por el entendedor; díxole que le pyntase, como podiesse mejor, en aquel logar mesmo un cordero menor. Pyntóle con la gran priessa un eguado carnero conplido de cabeça, con todo su apero; luego en ese día vino el menssajero: que ya don Pytas Pajas desta venía çertero. Quando fue el pyntor ya de Frandes venido, ffue de la su muger con desdén resçebido; desque en el Palaçio ya con ella estido, la señal que l' feziera non la echó en olvido. Dixo don Pitas Pajas: "Madona, sy vos plaz' Mostratme la figura e ¡aiam' buen solaz!"— Diz' la muger: "Monseñer, vos mesmo la catat: fey y ardidamente todo lo que vollaz".— Cató don Pitas Pajas el sobredicho lugar, e vydo grand carnero con armas de prestar. "¿Cómo, madona, es esto o cómo pode estar, que yo pynté corder, e trobo este manjar?"— Como en este fecho es syenpre la muger sotil e malsabyda, diz': "¿Cómo, monsseñer, en dos anos petid corder non se fer carner? veniésedes tenplano: trobaríades corder".— Por ende te castiga, non dexes lo que pides: non seas Pitas Pajas, para otro non errides. Con dezires fermosos a la muger conbydes: desque telo prometa, guarda non lo olvides. Pedro levanta la lyebre e la mueve del covil, non la sygue nin la toma, faz' como caçador vyl; otro Pedro que la sygue e la corre más sotil, tómala; esto contesçe a caçadores mill. Dyz' la muger entre dientes: "Otro Pedro es aqueste. Más garçón e más ardit, que l' primero que ameste: el primero apost déste non vale más que un feste, con aqueste e por éste faré yo, ¡sy Dios me preste!". Otrosí quando vyeres a quien usa con ella, quier sea suyo o non, fáblale por amor della; sy podieres, dal' algo, non le ayas querella: ca estas cosas pueden a la muger traella. Por byen poquilla cosa del tu aver, que l' dyeres, servirt' ha lealmente, fará lo que quisieres, fará por los dineros todo quanto pidieres: que poco o que mucho, dal' cadaque podieres".