Virgen, Del Çielo Reyna

Virgen, del çielo Reyna, e del mundo melezina, quiérasme oyr muy dina, que de tus gozos ayna escriva yo prosa dina por te servir. Dezir t'he tu alegría, rrogándote todavía, yo pecador, que a la grand culpa mía non pares mientes, María, más al loor. Tú siete gozos oviste: primero, quando rrescebiste salutación del ángel, quando oíste Ave María, conçebiste Dios, salvaçión. El segundo fue cunplido, quando fue de ti nasçido e syndolor, de los ángeles servido, fue luego conosçido por Salvador. Fue el tu gozo terçero, quando vino el luzero a mostrar el camino verdadero a los rreyes: conpañero fue en guiar. Fue la quarta alegría, quando te dixo, María, el Grabiel que Jhesuxristo vernía e por señal te dezía que viera a él. El quinto fue de grand dolçor, quando al tu fijo Señor viste sobir al çielo, a su Padre mayor, e tú fincaste con amor de a él yr. No es el sesto de olvidar: los discípulos vino alunbrar con espanto, tú estabas en ese lugar, del cielo viste entrar Spritu Santo. El setano non ha par, quando por ti quiso enbiar Dios tu Padre, al cielo te fizo pujar, con él te fizo assentar como a Madre. Señora, oy' al pecador: que tu fijo, el Salvador, por nos diçio del çielo, en ti morador, el que pariste, blanca flor, por nos nasçió. A nosotros pecadores non aborrescas, pues por nos ser merescas Madre de Dios; ant'él connusco parescas, nuestras almas le ofrescas, ruegal' por nos.