Tant que mes yeus pourront larmes espandre…

Tant que mes yeus pourront larmes espandre, À leur passé auec toy regretter ; Et qu’aus sanglots et soupirs resister Pourra ma voix, et un peu faire entendre :

Tant que ma main pourra les cordes tendre Du mignart Lut, pour ces graces chanter : Tant que l’esprit se voudra contenter De ne vouloir rien fors que toy comprendre :

Ie ne souhaitte encore point mourir. Mais quand mes yeus ie sentiray tarir, Ma voix cassee, et ma main impuissante,

Et mon esprit en ce mortel seiour Ne pouuant plus montrer signe d’amante : Priray la mort noircir mon plus cler iour.