Predit me fut, que deuois fermement…

Prédit me fut, que deuoit fermement Un iour aymer celui dont la figure Me fut descrite : et sans autre peinture Le reconnu quand vy premierement :

Puis le voyant aymer fatalement, Pitié ie pris de sa triste auenture : Et tellement ie forçay ma nature, Qu’autant que lui aymay ardentement.

Qui n’ust pensé qu’en faueur deuoit croitre Ce que le Ciel et destins firent naitre ? Mais quand ie voy si nubileus aprets,

Vents si cruels et tant horrible orage : Ie croy qu’estoient les infernaus arrets, Qui de si loin m’ourdissoient ce naufrage.