Quand i’aperçoy ton blond chef couronné…

Quand i’aperçoy ton blond chef couronné D’un laurier verd, faire un Lut si bien pleindre, Que tu pourrois à te suiure contreindre Arbres et rocs : quand ie te vois orné,

Et de vertus dix mile enuironné, Au chef d’honneur plus haut que nul atteindre : Et des plus hauts les louenges esteindre : Lors dit mon cœur en soy passionné :

Tant de vertus qui le font estre aymé, Qui de chacun te font estre estimé, Ne te pourroient aussi bien faire aymer ?

Et aioutant à ta vertu louable Ce nom encor de m’estre pitoyable, De mon amour doucement t’enflamer ?