Pallas est souuent

PAllas est souuent d'Homere Dite fille d'vn bon pere, Et vous la Pallas d'ici Par moy serez dite ainsi. Homere ainsi l'a nommée, Pour estre fille estimée Du Dieu que les siecles vieux Nommerent pere des Dieux: Et moy ie vous nomme telle, Fille d'vn Roy qu'on appelle Ici bas en tous endrois Le bon pere des François. Pallas & vous, ce me semble, Auez vos mestiers ensemble. Elle tousiours s'amusoit Aux vers qu'elle composoit: Souuent vostre esprit s'amuse Aux saints labeurs de la Muse, Qui en despit du tombeau Rendra vostre nom plus beau. Elle addonnoit son courage A faire maint bel ouurage Desur la toile, & encor A ioindre la soye à l'or: Vous d'vn pareil exercice, Mariez par artifice Desur la toile en maint trait L'or & la soye en portrait. Vne seule differance Vous separe : car la lance, Les guerres & les combats Estoient ses plus doux esbats: Mais vous aimant la concorde, Chasserez toute discorde, Et le plus beau de vos faits Ce sera d'aimer la paix, Et par nouueau mariage De Mars appaiser la rage, S'il vouloit vne autre fois Pousser en armes nos Rois.