Poème 38 (Dous fut le trait, qu'Amour hors…)

Dous fut le trait, qu'Amour hors de sa trousse, Pour me tuer, me tira doucement, Quant je fu pris au dous commencement D'une douceur si doucettement douce.

Dous est son ris, & sa vois qui me pousse L'ame du cors, pour errer lentement Devant son chant marié gentement Avec mes vers animés de son pouce.

Telle douceur de sa vois coule à bas, Que sans l'ouir vraiment on ne sait pas Comme en ses rets Amour nous encordelle.

Sans l'ouir, di-je, Amour mesme enchanter, Doucement rire, & doucement chanter, Et moi mourir doucement aupres d'elle.