Pour boire dessus

POur boire dessus l’herbe tendre Ie veux sous vn Laurier m’estendre, Et veux qu’Amour d’vn petit brin Ou de lin ou de cheneuiere Trousse au flanc sa robe legere, Et my-nud me verse du vin. » L’incertaine vie de l’homme » De iour en iour se roule comme » Aux riues se roulent les flos, » Puis apres nostre heure derniere » Rien de nous ne reste en la biere » Qu’vne vieille carcasse d’os. Ie ne veux selon la coustume, Que d’encens ma tombe on parfume, Ny qu’on y verse des odeurs : Mais tandis que ie suis en vie, I’ay de me parfumer enuie, Et de me couronner de fleurs. De moy-mesme ie me veux faire L’heritier pour me satisfaire : Ie ne veux viure pour autruy. Fol le Pelican qui se blesse Pour les siens, & fol qui se laisse Pour les siens trauailler d’ennuy.