Pour voir d’autres beautez

Pour voir d’autres beautez mon désir ne s’appaise, Tant du premier assaut vos yeux m’ont surmonté, Tousjours à l’entour d’eux vole ma volonté, Yeux qui versent en l’ame une si chaude braise.

Mais vous embellissez de me voir à mal-aise, Tigre, roche de mer, la mesme cruauté, Comme ayant le desdain si joint à la beauté Que de plaire à quelcun semble qu’il vous desplaise.

Desja par longue usance aimer je ne sçaurois Sinon vous, qui sans pair à soymesme ressemble. Si je changeois d’amour, de douleur je mourrois.

Seulement quend je pense au changement je tremble : Car tant dedans mon cœur toute je vous reçois, Que d’aimer autre part, c’est hayr ce me semble.