Si i’aime depuis n’aguiere

SI i’aime depuis naguiere Vne belle chambriere, Hé, qui m’oseroit blasmer De si bassement aimer ? Non, l’amour n’est point vilaine Que maint braue Capitaine, Maint Philosophe & maint Roy A trouué digne de soy. Hercule dont l’honneur vole Au Ciel aima bien Iole, Qui prisonniere dontoit Celuy qui son maistre estoit. Achille l’effroy de Troye, De Briseïs fut la proye, Dont si bien il s’eschaufa Que serue elle en trionfa. Ajax eut pour sa maistresse Sa prisonniere Tecmesse, Bien qu’il secouast au bras Vn bouclier à sept rebras. Agamemnon se vit prendre De sa captiue Cassandre, Qui sentit plus d’aise au cœur D’estre veincu que veinqueur. Le petit Amour veut estre Tousiours des plus grands le maistre, Et iamais il n’a esté Compagnon de maiesté. A quoy diroy-ie l’histoire De Iupiter qui fait gloire De se vestir d’vn oiseau, D’vn Satyre & d’vn toreau, Pour abuser nos femelles ? Et bien que les immortelles Soient à son commandement, Il veut aimer bassement. L’amour des riches Princesses Est vn masque de tristesses : Qui veut auoir ses esbas, Il faut aimer en lieu bas. Quant à moy ie laisse dire Ceux qui sont prompts à mesdire, Ie ne veux laisser pour eux En bas lieu d’estre amoureux.