Souuentefois nous

SOuuentefois nous auons faute Soit de biens soit de faueur haute, Selon que l'Astre nous conduit: Mais tousiours tandis que nous sommes Ou morts ou mis au rang des hommes, Nous auons besoin de bon bruit. Car la louange emmiellée Au sucre des Muses meslée Nous perce l'oreille en riant, Louange qui riche ne cede A l'or que Pactole possede, Ny aux perles de l'Orient. » La Vertu qui n’a cognoissance » Combien la Muse a de puissance, » Languit en tenebreux seiour, » Et en vain elle est souspirante » Que sa clarté n’est apparente » Pour se montrer aux rais du iour Mais ma plume qui coniecture Par son vol sa gloire future Se vante de n’endurer pas Que la tienne au sepulchre meure, Ny qu’orpheline elle demeure, Errante sans honneur là bas. Ie banderay mon arc qui iette Contre ta race sa sagette, Pour viser tout droit en ce lieu Qui se resiouit de ta gloire, Et où le grand fleuue de Loire Se mesle auec vn plus grand Dieu. Et bien que ta Muse soit telle, Que de soy se rende immortelle, Desdaigner pourtant tu ne dois L’honneur que la mienne te donne, Ny ceste Lyre qui te sonne Ce que luy commandent mes dois. Iadis Pindare sur la sienne Accorda la gloire ancienne Des Athletes, Princes & Rois : Ie veux entonner ta louange, Et l’enuoyer de Loire à Gange, Si tant loin peut aller ma vois. Car il semble que nostre Lyre Ta race seule vueille eslire Pour la pousser dedans les Cieux: Macrin a sacré la memoire De l'oncle, & i'honore la gloire Du neueu qui s'honore mieux. France sous Henry fleurit, comme Sous Auguste fleurissoit Romme: Elle n'est pleine seulement D'hommes qui animent le cuiure, Ny de peintres qui en font viure Deux ensemble eternellement: Mais grosse de sçauoir enfante Des fils dont elle est trionfante, Qui son nom rendent honoré: L'vn chantre d'Amour la decore, L'autre de Mars & l'autre encore De Phebus au beau crin doré. Entre lesquels le ciel ordonne Que le premier rang on the donne, Du Bellay, qui monstres tes vers Entez dans le tronc d'vne Oliue, Oliue dont la fueille viue Se rend egale aux Lauriers vers.