Vien à moy mon Luth. Consolation

VIen à moy mon Luth que i’accorde Vne Ode pour la fredonner Dessus la mieux parlante corde Que Phœbus t’ait voulu donner, Afin de la pouuoir sonner Si doucement qu’elle contante, Et puisse le soin destourner Qui mord vne royale tante. Donques, ô Chimere inconstante, Tu as dessous les ombres mis Le Prince qui fut nostre attante, Et l’effroy de nos ennemis : En vain donc il auoit promis De donter la rondeur du Monde, Et de voir sous Charles soumis Ce que Tethys serre en son onde. Vne pluye en larmes feconde Vous Muses, puisez de vos yeux, Lamentez la coulonne ronde Où s’appuyoit tout vostre mieux : Pour ta vertu dessus les Cieux O fils d’vn grand Roy tu reposes, Et ce bas monde vicieux Du Ciel tu regis & composes, Et nouuelles loix luy imposes Nouueau citoyen de là-haut Entre les immortelles choses, Et pres du Bien qui point ne faut. Des royaumes plus ne te chaut Dont tu as fait icy la preuue : Car rien de ce monde ne vaut Vn trait du Nectar qui t’abreuue. Tu as laissé la terre veuue Du vray honneur au Ciel montant, Où ta facile oreille appreuue Nos vœux qu’elle va escoutant. Appaise ton cœur lamentant, Essuye ton œil ma Princesse : Pour-neant tu vas regrettant Dequoy si tost ton neueu cesse, Et a pris son heureuse adresse Vers vne autre habitation, Changeant l’Auril de sa ieunesse Au bien de l’incorruption. Aux Dieux pleine de paßion Tu redemandes par priere Son corps dont la condition Ne doit deux fois voir la lumiere. Quand ton oraison coustumiere Sonneroit außi doucement Que la harpe tirant premiere Les bois en esbahissement : Encore l’ame nullement N’animeroit sa froide image, Puis que la Parque durement Luy a fait rendre son hommage. De Pluton l’auare heritage Ton neueu n’ira iamais voir, Que le Ciel pour son auantage Trop soudain a voulu r’auoir : Et ialoux, t’a fait receuoir (Pour s’enrichir de son enfance) Vn dueil, que le temps n’a pouuoir D’arracher de ta souuenance.