La jalousie mal fondée

TELLE qu’estoit Diane alors qu’imprudemment L’infortuné Chasseur la voyoit toute nuë, Telle dedans vn bain Dorinde s’est tenuë, N’ayant le corps vestu que d’vn moite Element.

Quelque Dieu dans ces eaux caché secretement, A veu tous les appas dont la belle est pourueüe : Mais s’il n’en auoit eu seulement que la veüe Ie serois moins jaloux de son contentement.

Le traistre, l’insolent, n’estant qu’vne eau versee, L’a baisee en tous lieux, l’a tousiours embrassee ; I’enrage de colere à m’en ressouuenir.

Cependant cét obiect dont ie suis idolatre, Durant tous ces excés n’a fait pour le punir Que donner à son onde vne couleur d’albastre.