La négligence avantageuse

IE surpris l’autre iour la Nymphe que i’adore, Ayant sur vne iupe vn peignoir seulement ; Et la voyant ainsi l’on eust dit proprement Qu’il sortoit de son lict vne nouuelle Aurore.

Ses yeux que le sommeil abandonnoit encore, Ses cheueux autour d’elle errans confusément Ne lierent mon cœur que plus estroictement, Ne firent qu’augmenter le feu qui me deuore.

Amour, si mon Soleil brusle dés le matin, Ie ne puis esperer en mon cruel destin De voir diminuer l’ardeur qui me tourmente.

Dieux ! quelle est la Beauté qui cause ma langueur ? Plus elle est negligee, & plus elle est charmante, Plus son poil est espars, plus il presse mon cœur.