Nv schǒwent wie des meýen zit

Nv schǒwent wie des meýen zit gezieret hat den grünen walt vnd schǒwent wie dú heide breit mit wunnenklichen blv̊men stat die vogel singent widerstrit ir fröide ist worden manicvalt vil gar verswunden ist ir leit der meie si getröstet hat

Der meýe tröstet al dc lebt wan mih vil minnesiechen man dc herze min ist minne wunt des mv̊s ich svnder fröide sin ist dc min lib iht fröiden lebet dc herze siht mich weinent an vnd giht es si vil vngesvnt so mv̊s lan die fröide min

Ein hohe minne gernder man mit stetem mv̊te dc bin ich min hohe minne gernde gir dc herze min vnsanfte treit frǒwe reine gar valsches an wibes krone verdenke dich genedeklichen noch gegen mir dur din vil hohen werdekeit

Si iehent ich sold vf gotes wege din lob niht singen frǒwe min sit es an mir missehagent so wil ich sprechen min gebet din ere habe got in siner pflege so mv̊s din lib enpfolhen sin Marien der vil heren maget dú nie an nieman missetet